ANDERKANT MET ANESCA SMITH

Nostalgie vir ’n ou Toyota

Haar fietsryery in Nederland is beter vir die omgewing, maar die hemel weet, sommige dae mis sy nog haar ou, betroubare Toyota wat spontane trips na vriende, die strand en eindelose teater- en restaurantbesoeke in Suid-Afrika moontlik gemaak het, skryf ANESCA SMIT.

18 Maart 2023
Daagliks
4 min om te lees

Oor die woonstel is ek nie spyt nie, maar elke nou en dan raak ek nostalgies vir my kar.

Die eerste motor in my ouerhuis was so ’n oranje Toyota met fake fur-sitplekoortreksels – hel in die middel van 'n Bolandse somer. Wat ek van dié kar onthou, is dat my ma, ’n onderwyser by die plaaslike laerskool, byna elke oggend laat was en hoe daar met skreeuende bande om die draaie gejaag is terwyl ek op die agterste sitplek rondval sans sitplekgordel − want ja, dit was die 1980's.

My man – wat fanaties oor veral vinnige motors is – sal dit nooit erken nie, maar ek is verreweg ’n beter bestuurder as hy. Kalmer en boonop uitstekend as dit kom by parallelparkering.

Alles te danke aan die eerste paar jaar as joernalis toe ek die Wes-Kaap moes platry agter stories aan. Ek het meer gery as geskryf. Soms só diep die platteland in dat ek moes oorslaap. Gelukkig nie in die kar nie.

Die koerant het ’n parkeerplaats vol karre gehad. Tough luck as jy die dag een van daardie outydse Citi Golfs gekry het. Ek het eendag amper in ’n muur vasgefoeter omdat die ding se pedale so smal is dat ek op die petrol in plaas van die rem getrap het. Ook nie so handig as jy jou op ’n plek bevind waar jy jou vinnig uit die voete moet maak nie, soos midde-in ’n bendeskietery op die Kaapse Vlakte.

’n Paar maande ná my studies koop ek my eerste motor en ’n wêreld van vryheid gaan vir my oop. Selfs al staan jou bankrekening op nul net voor die einde van die maand, was daar altyd nog ’n bietjie petrol in die tenk om na ’n vriendin se huis te ry en lekker te kuier.

’n Kar het spontane trips na die strand moontlik gemaak − vensters wyd oop, musiek wat uit die luidsprekers blêr – en om laataand vriende of ’n moontlike liefde vir drankies te ontmoet. Eindelose teater- en restaurantbesoeke.

Voertuie maak finansieel natuurlik nie soveel sin nie. Dis duur om te koop, duur om te onderhou en die waarde styg nie met die jare nie. En dis sleg vir die natuur.

Die fiets wat ek nou gebruik om heen en weer werk toe te ry is veel beter. Maar die hemel weet, sommige dae mis ek nog daardie ou, betroubare Toyota van my.

Mooi naweek

Anesca

Kom kyk hoe sewe vroueskrywers die pot roer. Michèle Meyer is die Moer in, Marida Fitzpatrick is so bitter soos Mara, Renée Rautenbach Conradie hys Die Vierkleur in Parys, Gerda Taljaard is so uitgeslape soos een van Vier susters, Bettina Wyngaard gaan vir jou in 'n Lokval lei, Celeste Theron sal jou Helder oordag laat droom en Emma Bekker gaan onder jou Vel kom. Hulle deel hulle geheime met Deborah Steinmair.

Kliek hier om die volle program te sien.