ANDERKANT MET ANESCA SMITH

Mag wysheid maar met grysheid kom vir Nederland se koning

Aan die vooraand van Willem-Alexander se verjaardag, en ná 10 jaar op die troon, skryf ANESCA SMITH oor die koning se blapse. DEBORAH STEINMAIR gee ’n kykie op vandeesweek se Boeke- en Vrye Tyd-stories.

08 April 2023
Daagliks
4 min om te lees

Dis nege jaar gelede geneem, maar daardie één foto agtervolg koning Willem-Alexander van Nederland steeds.

Dit was 2014 en die Olimpiese Winterspele is in volle gang in Rusland. Die Nederlandse koningsegpaar is ook daar en op een van die foto’s kan gesien word hoe hulle al laggend ’n lekker biertjie met Vladimir Putin aan die drink is. Proost.

Daardie foto het intussen sy eie lewe begin lei. Die koning probeer homself nog verweer. Eers verontwaardig: Hoe moes hy nou in hemelsnaam geweet het Putin sou ’n maand later die Krim binneval? Of dat pro-Russiese militêre ’n paar maande later vlug MH17 uit die Oekraïniese lugruim sou skiet? ’n Vlug waarin 192 Nederlanders omgekom het.

Nege jaar later voel hy hom genoodsaak om weer dáárdie foto te verduidelik. Nou meer gelate. Ag ja.

Want die koning (55) sit dié maand 10 jaar op die troon en om dit te vier maak hy ’n reeks podsendings oor koningskap. Die do’s en don’ts. Hy het veral ervaring met die don’ts. Skaats voortdurend op dun ys in ’n land wat hom toenemend afvra of koningskap in 2023 nog wenslik en paslik is.

Anders as die arme Charles het Willem-Alexander se ma, Beatrix – wat al dekades dieselfde valhelm-kapsel dra – hom nie 73-jaar laat wag voor hy die leisels kon oorneem nie. Nóg ’n gelukskoot is dat die wêreld so behep is met al die skandale rondom die Britse koningshuis dat niemand hulle veel steur aan wat die Europese koningshuise – dié wat nog bestaan – aanvang nie. Allermins die koninklikes in ’n klein landjie soos Nederland.

Willem-Alexander lyk na ’n hartlike man met ’n breë glimlag, rooiblonde hare en ’n rooiblonde baard wat hy laat uitgroei het toe baarde ’n paar jaar gelede nog hip was. Sy pakke is nooit nommerpas nie, meestal effens te ruim. Sy glansryke vrou, Maxima, het al na hom verwys as “’n bietjie dom”. Ongelukkig is hy ook iemand wat keer op keer bewys dat hy heeltemal uit voeling is met sy onderdane en ook nie soveel belangstel om in voeling te wees nie.

Neem byvoorbeeld die corona-pandemie. Terwyl die hospitale vol lê en die hele land op slot is, besluit hy, sy vrou en hul drie tienerdogters om met ’n privaat vliegtuig na Griekeland te verkas vir ’n vakansie in die son.

Die ophef onder die volk is egter so heftig dat hulle ná ’n dag of twee dikbek terugkeer. Dié keer, ewe teatraal, in ’n gewone KLM-vliegtuig. ’n Paar dae later kry ons ’n openbare boetedoening: Skuus, julle. Dan duur dit ’n paar maande voor hy weer in die goeie boekies van die volk is.

Jy kry die gevoel hy wil nie eintlik koning wees nie, maar is dol op die plesiertjies wat die pos meebring: ’n peperduur speedboat, ’n jaarlikse toelaag van meer as ’n miljoen euro, geen belasting nie, nog ’n paar miljoen om al die paleise in stand te hou.

Op 27 April is dit Willem-Alexander se verjaardag. Die koning is ’n jaar ouer en, kom ons hoop, veral wyser. Anders sien sy 18-jarige dogter dalk nooit die troon nie. Nie dat dít nou so ’n ramp sou wees nie.

Mooi naweek

Anesca

Oor 'n week vier ons Vrye Weekblad se boekefees in Cullinan. Elke gesprek kos R90 en kaartjies sal by die deur ook te koop wees. Luister hier na my gesprek op RSG met inligting oor die fees. Onthou om plek te bespreek vir ons twee uithaler-etes: Frik de Jager en Lientjie Wessels s'n. Vir Frik se ete bespreek jy op Quicket, vir Lientjie s'n by haar: 082 531 6141.

Kliek hier vir die volledige program.